ДСЗИ не констатира недостатоци во трите институции за смртта на 9-годишното дете

ДСЗИ не утврдил пропусти при третманот на починатото деветгодишно дете од светиниколското селко Пеширово. Инспекторите во вонредниот инспекциски надзор ја провереувале документацијата во трите здравствени установи каде детето било прегледувано и лекувано.

Во вторникот, истиот ден и кога починало прво е евидентирано кај матичниот лекар во Свети Николе заради болки во стомакот, повраќање, кашлица и 39 температура.

-При преглед детето било поспано, афебрилно, без убедливи знаци за дехидратација. Направени му се лабораториски испитувања по што дадена му е инфузиона терапија во тек на која кај детето настапува сомнолентност со слаба реакција на говор заради што е упатено во ЈЗУ Клиничка болница Штип, информираат од ДСЗИ и објаснуваат дека таму било донесено со такси возило околу 18 часот каде е прегледано, и од дежурниот лекар е поставена дијагноза сомноленција односно поспаност.

Повторно му е направена лабораторија и дополнително КТМ на глава. Заради општата лоша здравствена состојба како и наодите од испитувањата, детето со медицинска придружба и болничко возило по претходна  најава како итен случај околу 20:30 часот е префрлено на Детската клиника во Скопје.

-На прием детето е во општа тешка состојба поради што веднаш е започната со рехидратација и корекции на биохемиски параметри. Во 22:25 часа има дополнително влошување со респираторен и кардиак аррест, започната е реанимација во тек на која е симнато на ОИНТ за понатамошен третман. Состојбата на детето и понатаму се влошува и покрај сите пропратни интервенции, реанимацијата не е прифатена и во 23.30 часот настапува егзитус, стои во информацијата од здравствениот инспекторат.

Точната причина за смртта останува непозната бидејќи не е извршена обдукција зошто семејството одбило.

Обдукцијата пак треба да покаже од што починале близначињата во прилепското село Славеј, по првичните информации дека најверојатно е поради неухранетост и премрзнатост. Овој случај го испитува прилепското обвинителство.

За смртните случаи реагираа од опозициската ДУИ. Преку соопштение повикуваат министерството за здравство и останатите институции да преземат итни чекори.

-Фактот дека повеќе деца ги загубиле своите животи во последните шест месеци отколку во изминатите години треба да биде аларм за сите нас, бараат од ДУИ.