Средба Ахмети-Курц: Поддршка за евроатлантската интеграција на Македонија

Претседателот на Демократската унија за интеграција (ДУИ) Али Ахмети денеска се сретна со премиерот на Австрија Себастијан Курц, кој престојува во официјална посета на Македонија.

Како што соопшти ДУИ, на средбата станало збор за предизвиците на Македонија и регионот, а австрискиот премиер ја истакнал големата поддршка од Австрија за евроатланската интеграција на Македонија и за потребата од понатамошни реформи.

- Австрискиот премиер се враќа во Скопје за да ни даде поддршка на нашиот пат кон НАТО и ЕУ. Дојде време заедно да ги изодиме последните чекори кон посакуваниот успех - евроатланската интеграција, истакнал Ахмети.

Тој се заблагодарил за искажаната поддршка и ветил дека ДУИ со посветеност ќе работи за реализација на договорот и за понатамошно реформирање на општеството.