Во несреќа на автопат во Индија прегазени 18 работници

 Најмалку 18 работници, кои спиеле покрај патот, се прегазени кога камион со голема брзина удрил во автобус на автопат во Индија, соопшти денеска полицијата.

Повредени се уште 19 работници во несреќата која се случи доцна синоќа во областа Барабанки во индиската држава Утар Прадеш.

Локалниот полицаец Панкај Кумар Синг изјави дека автобусот со кој патувале работниците имал дефект, по што возачот го паркирал покрај автопатот. Работниците потоа заспале покрај патот во близина на автобусот.

– Неколку часа подоцна, камион кој се движел со голема брзина удрил во автобусот одзади, кој од ударот се поместил и ги прегазил работниците. Повеќето од жртвите загинаа на самото место, а неколку други им подлегнаа на повредите в болницата, објасни полицискиот службеник.

Синг истакна дека работниците се враќале од државите Харијана и Пенџаб во своите домови во соседната држава Бихар.