Руски воени блогери тврдат дека почнала украинската контраофанзива, Москва демантира

Москва ги демантираше пишувањата на руските блогери и изјавите на шефот на „Вагнер“, Евгени Пригожин, дека украинските сили оствариле напредок на фронтот во источна Украина. Пригожин пред неколку дена кажа дека регуларните руски војници напуштиле позиции кај Бахмут.

Во исто време, руски воени блогери известија за украинско напредување во неколку области.

„Поединечните изјави на Телеграм за пробив на фронтот во неколку точки не ја одразуваат реалноста. Општата ситуација во зоната на специјалната воена операција е под контрола“, соопшти руското министерство за одбрана.

Иако украинскиот претседател Володимир Зеленски вчера кажа дека противофанзивата сè уште не е целосно подготвена, некои руски воени известувачи тврдат дека е почната.

„Украински тенкови се на заобиколницата на Харкив и се движат кон руската граница. Меѓу нив има и многу западни тенкови. Со други зборови, Киев одлучи да ја влоши ситуацијата на северниот фронт, паралелно со офанзивните акции во правецот на Бахмут“, напиша Саша Коц, повикувајќи се на „сигурни“ извори.

Блогерот Александар Симонов, пак, напиша дека украинските сили зазеле неколку квадратни километри, откако се пробиле кон селото Богданивка близу Бахмут.

„Ситуацијата кај Бахмут се одвива според најлошото од предвидените сценарија. Териториите што сме ги освоиле во изминатите месеци по цена на многу животи сега се напуштаат речиси без борба од оние кои би требало да ги држат тие позиции“, изјави Пригожин.