Арсовска изврши увид во завршната фаза од реконструкцијата на улица „Бутелска“

Градоначалничката на Град Скопје Данела Арсовска денеска изврши увид на завршната фаза од градежните работи за реконструкција на улицата „Бутелска“.

– Град Скопје ја реконструира улицата „Бутелска“ од вкрстувањето со улица „Александар Урдаревски“ до приклучокот кон обиколницата. Реконструкцијата на коловозот е на површина од 7.687 квадратни метри и должина од 850 метри, ова е најпрометната улица во општина Бутел. Целосно се реконструираат оштетените тротоари и автобуските постојки, соопшти Град Скопје.

Во исто време, како што додаваат, се преземаа активности за подобрување на водоводната линија Ф400 со цел намалување на можности од дефекти на ново-асфалтираната улица во иднина поради дотраеност. За атмосферската канализација се изработува дел од крак DN 400 со цел да се развие нова општинска атмосферска линија.

– Со реконструирање на улицата „Бутелска“ се решава децениско барање на граѓаните во овој дел од општината, а воедно се олеснува функционирањето и движењето на повеќе од 25.000 граѓани кои секојдневно транзитираат на овој потег, наведуваат од Градот.