Вучиќ распиша предвремени парламентарни избори за 3 април

Претседателот на Србија, Александар Вучиќ ги распиша вонредните парламентарни избори во Србија за 3 април и донесе указ за распуштање на Народното собрание. Уредбата влегува во сила со објавувањето во Службен весник, јави дописникот на МИА од Белград

 

-Роковите за изборни дејствија почнуваат со стапување во сила на оваа одлука, а во суштина сите изборни рокови почнуваат да течат истовремено, изјави Вучиќ.

 

Изборите за пратеници во собранието ги спроведуваат органите за спроведување на изборите и оваа одлука влегува во сила со објавувањето во Службен весник.

 

Како што изјави српксиот претседател, Народното собрание досега направило многу, особено за владеењето на правото.

 

-Истовремено ни претстојат избори за Народното Собрание и за неколку локални самоуправи. Ги повикувам граѓаните да учествуваат на овие избори, да како земја покажеме демократски капацитет и да покажеме колку е важно да ги прифатиме плановите и програмите за иднината и да без разлика на различните мислења и планови, истите да можеме да ги искажеме на цивилизиран начин, почитувајќи се меѓусебно и сигурен сум дека тоа ќе биде уште еден чекор во демократската и европската иднина на Србија, изјави Вучиќ, заблагодарувајќи се и на владата.