Вработувања на 300 приватни специјализанти во април – ново ветување на Таравари

Ќе имаат ли трета среќа приватните специјализанти? Министерот за здравство денеска им ветил дека првите 300 ќе бидат вработени на почетокот на април а останатите 300 по локалните избори. Веруваат дека ова ветување ќе биде реализирано откако претходно пропаднаа најавите дека ќе бидат во работен однос на крајот на 2024, односно, во јануари 2025. Според здравстверните власти, причина за одолговлекување  на процесот е неостварените систематизации во јавните здравствени установи.

-Ние апелиравме до министерот да направат подобра координација меѓу здравствените домови и болниците да помогнат преку Министерството за информатичко општество кое е за систематизациите, процесот максимално да се убрза бидејќи не станува збор само дали некој ќе се вработи, туку и временската рамка, вели Д-р Александра Георгиева, претседател на Здружение на лекари специјализанти.

Од ланското лето кога беше донесена одлуката на Влада за нивно вработување досега, овие доктори се уште работат за месечна плата од 26 000 денари без здравствено и пензиско  осигурување и постојано во исчекување кога ќе биде финализиран нивниот работен однос.

- Дискутиравме и за методологијата на вработување бидејќи има доста нејаснотии и прашања во јавноста, па и од наши колеги кои чекаат вработување. Вработувањата ќе се организираат преку јавни конкурси, но тие ќе бидат наменски за специјализанти од дадена специјалност со цел да им се даде предност на колегите од приватна специјализација да го остварат правото на вработување, вели д-р Георгиева.

Инаку пред една година приватните специјализанти организираа протести и штрајк бидејќи работат без решен работен статус и без стаж а немаат ни платено породилно отсуство. И денеска ги имаат истите проблеми и предизвици, но сега и ветувања кои треба да се реализираат за два месеци.