Украина го обвини главниот пропагандист на Путин за поттикнување геноцид

Украинската служба за безбедност (СБУ) поднесе кривична пријава против Владимир Соловјов, еден од најистакнатите руски државни ТВ водители и пропагандисти, поради поттикнување геноцид и отворено повикување на напади врз украински цивили. Соловјов, кој живее во Русија, не е уапсен бидејќи е недостапен за украинските власти.

СБУ наведува дека против Соловјов се покренати обвиненија според пет члена од украинскиот Кривичен законик, вклучувајќи повреда на територијалниот интегритет на Украина, поттикнување геноцид, оправдување на руската вооружена агресија, воена пропаганда и дејствија насочени кон насилно менување на уставниот поредок.

Според документите на украинските истражители, Соловјов во повеќе наврати за време на неговите настапи на руската државна телевизија повикувал на употреба на тактичко нуклеарно оружје против Украина и барал целосно заземање на четири региони на југот и на истокот на земјата. Спорните изјави се емитувани на неговите емисии на каналот „Русија-1“, на Московското радио и на неговиот канал на Телеграм.

Соловјов од 2024 година е на украинската листа на „Путинови пропагандисти“ на украинската веб-страница „Војна и санкции“, заедно со други истакнати личности како Маргарита Симонјан, Олга Скабеева и Александар Дугин.