Македонија
2. February 2021 - 17:40

Средба на потпретседателот на ВМРО-ДПМНЕ Николоски со амбасадорката на Португалија, Марија Виргина Пина

Денеска остварив средба со амбасадорката на Португалија, Марија Виргина Пина која што е задолжена и за Република Македонија.

Португалија претседава со ЕУ од први јануари оваа година во следните шест месеци. И е вонредно означена за Македонија. Затоа што треба да се направи напор во рамки на португалското претседателство, Македонија конечно да ги почне преговорите за членство со ЕУ.

Со амбасадорката разменивме мислења околу актуелната политичка и економска ситуација во Македонија, и ја информирав за загрижувачки високото ниво на корупција во Македонија, кое што е отсликано и во последниот Извештај на Транспаренси Интернешнл, каде што Македонија се наоѓа најниско во својата историја на 111-тото место. Исто така ја информирав за застојот во реформите, како за здравствената и економска криза со која што се соочува Македонија.

Ја информирав амбасадорката и за работата на Националниот Совет за евроинтеграции, чиј што сум претседател, како едно тело во кое што треба да се обединат сите клучни политички фактори во европските интеграции на Македонија.

Она за што исто така ја информирав амбасадорката е немањето конкретна волја на власта да спроведе и да реализира реформи, како и затскривањето позади одредени потези на власта кои што само сугерираат за жал криминал и корупција.

Тоа што би сакал да го нагласам е дека е мое задоволство што сум прв политичар од Македонија кој што има средба со амбасадорката откако Португалија претседава со ЕУ. Сметам дека ова е еден значаен чекор, дека е уште една можност ВМРО-ДПМНЕ и јас лично да ги покажеме нашите приоритети, и се надевам дека е поттик за власта да остварат подобри контакти со Португалија и со нивната амбасадорка. Затоа што сметам дека мора да се искористи португалското претседателство и да создаваме пријатели како држава кои што како пријатели ќе ни помагаат на овој европски пат.

Со амбасадорката разменивме мислења и за регионалниот контекст, за условувањата кои што Македонија ги има од Бугарија при што нагласив дека не може и нема да има разговори за македонскиот национален идентитет, за засебноста на македонскиот јазик, македонскиот народ и македонската култура, тоа се основни столбови на македонската држава и за истите не може да има разговори.

Се надевам да го продолжиме овој конструктивен дијалог со амбасадорката Марија Виргина Пина и се надевам дека за скоро време ќе го посети и Скопје, каде што ќе можеме да ги продолжиме овие разговори.

Александар Николоски, потпретседател на ВМРО-ДПМНЕ

Центар за комуникации на ВМРО-ДПМНЕ