Поранешен службеник на НСА обвинет за кражба на илјадници доверливи документи

Поранешниот вработен во американската Националната агенција за безбедност (НСА), Харолд Томас Мартин, е обвинет од поротата на Судот во сојузната држава Мериленд за кражба на илјадници доверливи и чувствителни разузнавачки документи и податоци поврзани со националната одбрана на САД.

Мартин (52), кој беше уапсен во август минатата година, е обвинет за 20 разни кривични дела, поврзани со чувањето на државните документи и податоци, дома и во неговиот автомобил.

Според американските медиуми, станува збор за класифицирани документи на НСА, на американската кибер команда, на ЦИА и на Националното биро за набљудување (НРО), што Мартин ги собирал од 1996 до 2016 година.

Обвинителството тврди дека материјалите содржат податоци за американските воени потенцијали, за операциите на војската, како и за откриените методи на странските разузнавачки агенции и за целите и интересите на САД.

Американското Федерално истражно биро (ФБИ) засега нема сознанија за тоа, кои биле мотивите на овинетиот Мартин да ги краде материјалите и да ги чува кај себе.

Неговиот прв адвока,т кој му бил доделен по службена должност, на првото сослушувње рече дека обвинетот бил „опседнат“ со документи и податоци, но адвокатот на последното сослушување, не се обидел да ги објаснува мотивите за ваквото однесување.

За НСА, Харолд Томас Мартин бил ангажиран преку договор што агенцијата го имала со една консалтинг фирма, која веднаш го раскинала договорот, кога полицијата го уапси пред шест месеци.

Но, тој има долго искуство за работа со „чувствителни материјали“ во разузнавачкиот сектор, а десет години бил припадник на американската воена морнарица и има чин на поручник.

Информациите кои биле дигитално чувани во неговиот автомобил, биле еднакви на 50 илјади гигабајти, што е доволно за складирање на 500 милиони документи со слики и текстови.