Лондон и Париз: Да прекинат нападите врз бунтовниците во Сирија

 Велика Британија и Франција денеска апелираа до сириската Влада и нејзиниот сојузник Русија итно да прекинат со нападите врз бунтовниците во Сирија, кои имаат поддршка од Западот.

Во заедничкото соопштение на двете земји е нагласено дека сите страни мораат во целост да го почитуваат договорот за прекин на непријателствата и без попречување да овозможат пристап до сите подрачја, кои се под опсада.

- Сите напади врз цивилите и медицинскиот персонал, исто така, мора да бидат запрени, се наведува во соопштението, објавено по средбата на францускиот претседател Франоса Оланд и британскиот премиер Дејвид Камерон.

Во документот се истакнува и дека сириската Влада и нејзините сојузници мора да го запрат „маршот кон Алепо, кој ги компромитира мировните обиди, а се заканува и драматично да ја влоши бегалската криза и да биде корисен за Исламска држава“.