Кратовски основци во Еразмус - проект за безбедност на интернет и заштита од булинг

Во проектот учествуваат наставници и ученици од партнер-училишта од нашата земја, Романија, Шпанија, Луксембург и Финска, а домаќин на првата мобилност во рамки на проектот од 9 до 13 до декември беше училиштето „Георге Вранчеану“  во Бакау.

 

- Пет ученици и јас како ментор, заедно со директорката на училиштето Марина Бојковска, поминавме една работна недела во Романија за време на која проследивме презентации на сите партнер училишта. Се реализираа работилници за меѓусебно запознавање и работилници за булинг и лажни вести. Учениците научија многу, а во оваа седмица со колегите, пак, од партнерските образовни институции одржавме неколку координативни состаноци во врска со конкретните активности во остатокот од проектот што се планираат за мај 2020 година, информираше Кристина Цонкинска, професорка по англиски јазик и координатор на проектот во ООУ „Кочо Рацин” во Кратово.

 

Во рамки на посетата реализирани се и две екскурзии во градовите Брашов и Јаши, каде учесниците имале можност да посетат знаменитости.

 

- Со оваа Еразмус размена, нашите ученици се збогатуваат интелектуално и духовно, проширувајќи ги знаењата и на тема булинг и безбедно пребарување на информации на интернет, но и нивните јазични знаења, а секако го прошириуваат и кругот на пријатели, додаде Цонкинска.