Економскиот факултет во Прилеп одбележа 55 години постоење

Економскиот факултет во Прилеп денеска го одбележа јубилејот 55 години постоење. На одбележувањето беше промовирана и најновата, 55-та генерација дипломци. 

 

Во обраќањето, деканот Ѓорѓи Манчески нагласи дека и по пет и пол децении Прилепскиот економски факултет останува престижна институција во економската наука во земјава и во едукацијата на кадри од економијата, бизнисот, менаџментот, сметководството, ревизијата, маркетингот, информациските технологии.

 

- Од јадро на интелектуалниот капацитет во овој регион, денеска е респектабилна високообразовна институција чии дипломи се признати секаде во светот. Факултетот е инвестиција на македонската интелектуална авангарда, инвестиција на прилепското стопанство преку директни инвестиции од времето кога се градел. До денеска на Факултетот дипломирале преку 16.000 економисти и околу 60 докторирале на економските науки, рече Манчески.

 

Според ректорот на битолскиот универзитет „Св. Климент Охридски“ Сашо Коруноски, илјадниците дипломирани студенти се доказ дека наставно-научната работа е на високо ниво.

 

- Постојано иновирајќи ги наставните програми, Факултетот се определува за стручни кадри кои ќе се носат со предизвиците на економијата на микро и макро план, рече Коруноски.

 

За прилепскиот градоначалник Марјан Ристески е битно и што заедно со Факултетот почна практиката на ангажирање на најдобрите дипломци, особено во стопанските капацитети.

 

Од 55-тата генерација дипломци кои беа промовирани на прославата, 173 се дипломирани студенти, а 39 магистри.

 

 

Во рамки на јубилејот, цел месец се одржуваа серија предавања на гости експерти од земјава и странство.