Заев: Некој се обидува да ја ништи освоената правда

 Стотици илјади граѓани со години се боревме да ги срушиме алчните арамии од режимот и успеавме. Сега, некој се исмева со таа борба и се обидува да ја ништи освоената правда, напиша поранешниот премиер Зоран Заев на фејсбук коментирајќи ги поништените пресуди на поранешниот шеф на Управата за безбедност и контраразузнавање, Сашо Мијалков, од страна на Апелациониот суд.

– Со двете поништени пресуди, директно се упатува на враќање, а со тоа и повторување на грозоморните дејствија на режимската врхушка и секако се мотивираат и други чинители да прават исти вакви грозоморни дејствија со кои се газат масовно човекови права и сите вредности за кои се бореше целиот македонски народ пред само неколку години преку Шарената револуција, објаснува Заев.

Што е следно, напишал тој, Мијалков да стане директор на АНБ, а Груевски да се врати невин на бел коњ? Според него, и утре да станеме членка на ЕУ тоа нема да го испере овој срам и блам.

Зоран Заев ги повикува сите надлежни од и околу правосудството, сите, како што пишува на неговата објава, со грам одговорност за иднината на нашата земја и нашиот народ, да не дозволат да застарат делата на Мијалков и да направат сѐ виновниците да одговараат бидејќи за нивните злодела има докази чисти како ден.