Вработени од Еурокомпозит на протест во Скопје

Вработени од прилепскиот загубар Еурокомпозит се собрани пред зградата на ССМ во Скопје. Најавуваат дека ќе одат пред Собранието, а потоа пред Владата каде ќе постават шатори и ќе кампуваат се додека не им бидат исплатени двете заостанати плати.

Вчера вицепремиерот за економски прашања Кочо Анѓушев порача дека Владата во наредните пет до шест месеци квалитетно ќе го реши проблемот на вработентите во Еурокомпозит, а во меѓувреме тие ќе ги земаат платите во месеците во кои ќе работат.

- Проблемот со Еурокомпозит се провлекува последните 15 години и не се создаде сега. Вработените немаат земено плата со години наназад и никој претходно не се обидел квалитетно да го реши нивниот проблем. Како Влада имаме донесено одлука Еврокомпозит да стане добро и здраво прептријатие и ќе ги разгледаме сите можности како да стигнеме до тоа, посочи вчера Анѓушев. 

Вработените од Еурокомпозит веќе повеќе денови наназад бараат од Владата и вицепремиерот Анѓушев да го исполнат ветувањето што им го дале и да им ги исплатат двете заостанати плати во спротивно најавуваа дека ќе кампуваат пред Владата се додека не биде исполнето нивното барање.