Србија и Унгарија потпишаа договор за одбранбена соработка, Вучиќ најави и воен сојуз
Во Палатата Србија во присуство на претседателот на државата, Александар Вучиќ денеска беше потпишан документ од областа на одбраната меѓу Србија и Унгарија, јави дописникот на МИА од Белград.
Планот за билатерална воена соработка меѓу министерствата за одбрана на Србија и Унгарија за 2025 година – документ за операционализација на стратешката соработка во областа на одбраната меѓу двете земји, го потпишаа министерот за одбрана на Србија, Братислав Гашиќ и министерот за одбрана на Унгарија, Криштоф Салаи-Бобровнички.
Клучни елементи на договорот се можноста за заеднички вежби и воено-техничка соработка во набавката на оружје.
На потпишувањето присуствуваше и началникот на ГШ на војската на Србија, генерал Милан Мојсиловиќ.
Вучиќ по средбата изјави дека Србија има најразвиена и најинтензивна соработка на полето на одбраната со Унгарија во регионот и изрази уверување дека „договорот за заеднички активности ќе продолжи во натамошното зближување и создавање воена алијанса или воен сојуз меѓу Србија и Унгарија“.
„Секако, за тоа се прашува унгарската страна, се прашуваат унгарскиот и српскиот парламент и сите други“, рече Вучиќ на заедничката конференција. Тој додаде дека денеска е потпишан документ со кој се операционализира и конкретизира договорот за стратешка соработка во областа на одбраната постигнат во 2023 година.
Со Документот потпишан денеска се договорени 79 активности за оваа година.
Вучиќ најави и претстојна средба со унгарскиот премиер Виктор Орбан, на која ќе продолжат разговорите за стратешка соработка. Лани, трговската размена меѓу двете држави надмина три милијарди евра.
Ново на Сител
-
Град Скопје: Наместо во истрага, институциите учествуваат во криминал
-
Топ-листа: 25 најдобри нудистички плажи во светот
-
Новата дрога „Јелоу зуши“ пристигна и во Албанија
-
Села: Најавите дека пратеници од Европски фронт ќе прејдат во владејачкото мнозинство се лага и специјална активност на службите
-
Путин со пет услови за завршување на војната во Украина
-
Мицкоски: Целокупната тендерска документација за набавката на униформи за полицијата ќе се стави на увид на јавноста
-
Во Грција уапсен македонски државјанин баран од германските власти за убиство
-
Неготинец пријавил измама од тетовец за работа во странство