СП 2019: Традицијата за Исланд, последните дуели за Македонија

Ракометната репрезентација на Македонија попладнево (18 часот) во Минхен во Олимпијахале го игра клучниот натпревар во групата. Противник ни е селекцијата на Исланд, репрезентација против која имаме одиграно најмногу натпревари, досега 15. Билансот не ние најдобар имаме 3 победи, 1 нерешен резултат и 11 порази.

Првиот натпревар го огравме 1999 година во рамките на баражите и првите дуели против оваа селекција беа најчесто баражи.

Важна победа од осум разлика Македонија постигна во јуни 2008 година кога го елиминиравме Исланд и се пласиравме на СП во Хрватска 2009 година.

Поразите беа составен дел и на следните неколку дуели кога имавме серија од пет загубени натпревари. Серијата беше прекината во Мец 2017 на СП кога одигравме нерешено (27:27) што за нас беше рамно на победа. Следниот дуел во Скопје во мај 2017 го добивме со пет разлика - 30:25, а потоа во Рејкјавик загубивме со 26:25, но бевме конкурентни и водевме во поголемиот дел од дуелот.

Традицијата е на страната на Исланд, но последните дуели нашиот национален тим е тој кој се прашува за конечниот исход - затоа веруваме во успех на денешниот натпревар и во победа за пласман во главната фаза.