Смотрич се закани дека ќе ја собори владата доколку Израел не ја окупира Газа

Израелскиот министер за финансии, ултрадесничарот Безалел Смотрич, денеска го повика Израел да го окупира Појасот Газа и да воспостави воена управа, заканувајќи се дека во спротивно ќе ја собори владата.

Во изјавата за военото радио, Смотрич, лидер на партијата Религиозен ционизам, изјави дека Израел „мора да ја окупира Газа и да формира привремена воена влада, бидејќи нема друг начин да се победи Хамас“.

-Ќе ја соборам владата ако таа не се врати на борбите на начин што ќе нè наведе да го преземеме целиот Појас Газа и да владееме со него, рече Смотрич, критикувајќи го генерал-полковник Херзи Халеви, началникот на Генералштабот, тврдејќи дека неговата стратегија е слаба.

„Да бев премиер, ќе му кажев на началникот на Генералштабот: „Ова е мојата политика, ако не ја спроведувате, одете дома“, додаде министерот, инсистирајќи Израел да ја преземе безбедноста и контролата на хуманитарната помош за Газа.

Нетанјаху во претходните изјави најави дека Израел нема план да ја освои Газа или трајно да ја окупира.

Израелскиот министер за надворешни работи Гидеон Саар денеска, непосредно по почетокот на прекинот на огнот во војната во Газа, предупреди на регионална нестабилност доколку Хамас остане на власт.

-Доколку Хамас остане на власт, регионалната нестабилност што ја предизвикува веројатно ќе продолжи, нема иднина за мир, стабилност и безбедност за двете страни доколку Хамас остане на власт во Појасот Газа, предупреди министерот Саар на прес-конференција во Ерусалим.