Што очекуваат Македонците во Америка од Доналд Трамп?

Да се зајакне соработката меѓу Македонија и САД со прокламацијата септември да биде месец на македонско-американската култура, како и да се постигне даночниот договор, со чие усвојување би се избегнало дуплото одданочување меѓу двете држави. Ова се двете приоритетни очекувања на Македонците во Америка, од новиот претседател Доналд Трамп, кој во јануари следната година по вторпат, ќе се всели во Белата куќа. 

Дали ќе може да се патува без виза во Америка? Познавачите велат дека тоа зависи од политичката волја на владата. 

Во Америка според проценките на дијаспората, живеат половина милион Македонци. Експертите нотираат дека македонските државјани се дел од клучните заедници, и за кампањата на демократите, и за републиканците. Токму претходниот викенд во Детроид митинзи држеа и Харис и Трамп, место каде македонската заедница е доста влијателна.

Големо влијание од Македонците кои гласале на овогодинешните претседателски избори има и во Пенсилванија и Невада, кои важат за свинг држави, односно држави кај кои не може да се предвиди за кој претседателски кандидат ќе преовладаат гласовите.