Штајнмаер: Примирјето во Сирија би било невозможно без Русија

Германскиот министер за надворешни работи Франк Валтер Штајнмаер изјави дека Русија одиграла важна улога во постигнувањето спогодба за примирје во Сирија, со што се обезбеди пристап за хуманитарната помош и почнаа мировните преговори во Женева, јави ТАСС.

- Примирјето, обезбедувањето пристап за хуманитарната помош и почнувањето на мировните преговори во Женева, сето тоа не би било можно да се спроведе без конструктивното учество на Русија. рече Штајнмаер во денешното интервју за „Функе медиа груп“.

Шефот на германската дипломатија нагласува дека е вистина оти Русија има сопствени, сосема различни интереси во Сирија, а тоа е обезбедување заштита на воените бази. 

- Ова исто така се однесува и на создавањето на нејзини сфери на влијание. Но, Русија не е заинтересирана за долгорочен хаос и целосно уништување на државните структури на Блискиот Исток, оцени тој.