Шпанската полиција изврши рација во куќата на Мароканецот кој уби црковен службеник и рани свештеник во градот Алгерисас

Шпанската полиција денеска изврши рација во домот на Мароканец кој е приведен за напади со мачети во две католички цркви во градот Алгерисас, на југот од земјата, во кои вчера беше убиен црковен службеник, а ранет еден парохискиот свештеник.

Полицијата се уште го истражува мотивот за вчерашните напади, а судија од Националниот суд го истражува инцидентот како можен терористички акт.

Шпанскиот министер за внатрешни работи Фернандо Гранде-Марласка изјави дека се верува дека осомничениот делувал сам и дека полицијата го пребарала неговиот дом за да ја утврди природата на нападот, пренесоа американските медиуми.

Осомничениот е марокански државјанин кој немал криминално досие, ниту во Шпанија, ниту во која било друга држава, соопшти шпанската полиција.

Осомничениот од јуни минатата година бил под наредба за  депортација поради неговиот статус на илегален мигрант во Шпанија.

Очевидци изјавија дека во вториот инцидент напаѓачот скокнал врз олтарот на црквата Нуестра Сењора де ла Палма, држејќи мачета, го нападнал црковен службеник во црквата, а потоа го убил на градскиот плоштад. Мароканецот претходно ранил и свештеник во црквата Сан Исидро.

Селезијанскиот религиозен ред денеска соопшти дека свештеникот е надвор од животна опасност.

Алгесирас е космополитски пристанишен град и прва  точка на пристигнување на многу бродови што превезуваат мигранти од Северна Африка.