Самит во Париз: Усвоен нацрт-договор за борба против климатските промени

Учесниците на Меѓународната конференција за климата, која се одржува во Париз, денеска усвоија нацрт глобален договор за борба против климатските промени и го проследија до министрите за надворешни работи и заштита на животната средина за да ги разработат преостанатите спорни точки од тој документ.

Претседавачот на работната група која работеше на нацртот го прогласи документот за усвоен непосредно пред истекот на рокот, предвиден за денеска на пладне, откако преговарачите се согласиле да направат „козметички измени“, побарани од некои делегации.

Нацрт договорот е полн со загради и повеќекратни опции, што покажува дека серијата спорни точки останува да се разработи, а повеќето се однесуваат на начинот на дефинирање на обврските на земјите во различни фази на развој во борбата против климатските промени.

Министрите сега имаат уште една недела за преговори за конечниот договор, со оглед на тоа дека повеќедневниот самит во париз завршува на 11 декември.