Премиерот Заев ќе учествува на Глобалниот бизнис-форум на Блумберг

Претседателот на Владата на Република Македонија Зоран Заев во рамки на активностите за време на Генералното собрание на Обединетите нации во Њујорк денеска ќе учествува на Глобалниот бизнис-форум на Блумберг, на кој ќе учествуваат шефови на држави и влади, како и претставници на најголемите светски компании.

Како што соопшти владината прес-служба, во текот на денот премиерот Заев ќе има билатерална средба со еврокомесарот за проширување на Европската Унија Јоханес Хан, а ќе присуствува и на вечерата што ја приредува високата претставничка за надворешна политика и безбедност на Унијата, Федерика Могерини.

Претседателот на Владата Заев ќе присуствува и на приемот во организација на премиерот на Хрватска, по повод 25-годишнината од членството на оваа земја во Обединетите нации.