Планот 3-6-9 претставен пред амбасадорите на земјите членки на ЕУ

Заменик претседателот на Владата на Република Македонија, Бујар Османи, деенска во просториите на Делегацијата на Европската Унија го презентира Планот 3-6-9 пред евроамбасадорот Самуел Жбогар и амбасадорите на земјите-членки на ЕУ, соопшти Секретаријатот за европски прашања (СЕП).

- Во овој План се опфатени реформите кои Владата ќе ги спроведува во претстојниот период од 3 месеци односно до одржувањето на локалните избори, а во меѓувреме паралелно се работи и на допрецизирање на мерките кои треба да се реализираат во наредните 6 и 9 месеци, рече Османи. Истакна дека Владата се залага за обезбедување транспарентност и инклузивност, вклучително и со вклучување на опозицијата. 

Вицепремиерот Османи ја нагласи посветеноста на Владата на спроведувањето на овие реформи и важноста да се искористи позитивната клима, но изрази и очекување дека, во согласност со успешноста при реализацијата на преземените обврски, земјите-членки на Унијата ќе преземат конкретни чекори во насока на забрзување на евроинтегративните процеси на Република Македонија, вклучително и чиста препорака за почеток на преговорите.

Планот 3-6-9 прв пат беше презентиран пред јавноста минатата недела, и е практично првиот чекор на Владата за сериозен пробив на земјата кон евроатлантските интеграции, по  долгогодишниот застој во овие области, истакнуваат од СЕП.