Околу 400 пензионери од Куманово поднеле барања за бесплатна бања и викенд

Околу 400 пензионери од Куманово поднеле барање до Подрачната единица на Фондот за пензиско и инвалидско осигурување за користење на бесплатна бања и бесплатен викенд.

Од Подрачната единица на Фондот за пензиско и инвалидско осигурување информираат дека рокот за поднесување барања истекува задутре.

Поголем дел од пензионерите, односно околу 300, поднеле барање за користење на бањско-климатска рекреација, а помал број околу 100 корисници на пензија поднеле барање за користење на бесплатен викенд.

Во рамки на проектот за бањско-климатска рекреација, државата на пензионерите им обезбедува шест полни пансиони, бањска терапија, задолжителен здравствен преглед и платени трошоци за превоз во висина на повратна автобуска карта. Со проектот за бесплатен туристички викенд на пензионерите им се обезбедени два полни пансиони и автобуски превоз до хотелскиот објект.