Одбележана годишнина од формирањето на Градската библиотека во Битола

НУ Универзитетска библиотека „Св.Климент Охридски“, меѓу битолчани позната како Градската библиотека одбележа 71 - година од денот на формирањето.

Градската библиотека во Битола од која настала денешната национална установа, формирана е на 25 март 1945 година со одлука и решение на тогашниот Градски народен одбор во Битола.

- Градската библиотека во Битола почнала да работи со книжен фонд од 300 книги, кои главно биле затекнати книги подарени од поединци, организации и установи. Денеска библиотеката претставува современа, културна институција со развиена библиотечна дејност, која на своите корисници постојано им нуди нови и современи содржини и културни настани кои го збогатуваат културниот живот, а исто така придонесуваат за унапредување на воспитно-образовните, како и стручно научните и истражувачките дејности, беше истакнато на денешниот славенечки настан на библиотеката кој се одбележа со најмладите ученици кои го посетуваат Заводот за рехабилитација на деца со оштетен слух, говор и глас и други проблеми во развојот „Кочо Рацин“ – Битола.

Библиотеката располага со над 600.000 книги, периодични весници и списанија како и друг библиотечен материјал, со тенденција за натамошно перманентно зголемување.