На заедничката владина седница со Албанија ќе бидат потпишани повеќе меморандуми и одлуки за соработка

Односите меѓу Северна Македонија и Албанија се на исклучително високо ниво, исто како што се на исклучително високо ниво и со другите соседни држави, изјави денеска премиерот Димитар Ковачевски по увидот на реконструираната полициска станица во Гази Баба.

Одговарајќи на новинарско прашање за утрешната заедничка владина седница со Албанија, Ковачевски рече дека граѓаните може да очекуваат да има средба меѓу двете влади, во исклучително позитивна атмосфера.

-Министерствата веќе имаат подготвено поголем број меморандуми и одлуки за соработка, кои утре не само што ќе бидат разгледани, туку и ќе бидат потпишани заедно со министрите од Албанија, нагласи Ковачевски.

Премиерот посочи дека за целиот тек на средбата за заедничката владина седница медиумите постојано ќе бидат информирани. Подоцна, како што рече, веројатно ќе следува и прес-конференција со премиерот на Албанија Еди Рама.