Најмалку 27 загинати при налетот на тајфунот Демри во Виетнам

Најмалку 27 лица загинаа, а 22 се водат како исчезнати при налетот на силните ветрови и поројниот дожд предизвикани од тајфунот Демри, што вчера ги погоди централните и јужните делови на Виетнам, соопштија денеска виетнамските власти. 

При ударот на ветровите, кои наместа дувале и со брзина до 90 километри на час, се оштетни над 40.000 станбени и деловни објекти. Поради невремето властите евакуираа околу 33.000 лица.

Од тајфунот најтешко се погодени реоните на Виетнам познати по одгледување на кафе, поради што се очекува одлагање на стартот на бербата.

Засега нема информации за штетите на насадите со кафе, но властите веќе соопштија дека при невренето се уништени над 40.000 хектари површина под шеќерна трска и ориз. 

Во поплави во северен Виетнам минатиот месец загинаа над 80 лица.

Ударот на Демри доаѓа во пресрет на Самитот на Организацијата за Азиско-пацифичка економска соработка (АПЕК), што следната недела ќе се одржи во Виетнам.