Најмалку 19 загинати во вчерашниот земјотрес во Јапонија

Најмалку 19 лица загина во вчерашниот земјотрес со интензитет од 7,4 степени според Рихтеровата скала, што ја погоди префектурата Кумамото на јужниот јапонски остров Кјушу.

Во истото подрачје во четвртокот беше регистриран потрес со јачина од 6,5 степени според Рихтер, при што загинаа десет лица.

Со ова како што соопшти синоќа главниот секретар на јапонската Влада, Јошихиде Суга, вкупниот биланс на загинати во двата земјотреси се искачи на 29 лица. Вкупно се повредени речиси 1.500 лица, од кои околу 80 се наоѓаат во критична состојба.

- Ве молам да се помагаме меѓусебно и да го задржиме мирот, изјави Суга на прес-конференција, која беше пренесувана во живо на речиси сите телевизии во земјата.

Тој најави дека во регионот погоден од земјотресот властите ќе испратат меѓу 15 и 20 илјади припадници на јапонската Армија, како и дополнителен број полицајци, пожарникари и медицински персонал, кои ќе се вклучат во спасувачките операции.