Наградени најдобрите на конкурсот „Млади поети“ на АМС

Анастасија Спировска, Елена Костовска и Алана Чаушоска, со едногласна одлука од Комисијата составена од Друштвото на писатели на Македонија (ДПМ), се победници на годинашниот конкурс „Млади поети“ на Агенцијата за млади и спорт.

Со овој проект, како што истакна директорот на Агенцијата за млади и спорт Марјан Спасески,  им се дава финансиска поддршка на најдобрите млади поети, се стимулираат да творат и нивното културно творештво да се пренесува до пошироката публика. Годинава обезбедени се три парични награди. Првопласираната ќе добие 15.000 денари, второпласираната 10.000 и третопласираната 5.000 денари. 

- Најголемата награда за сите нив е оваа збирка поезија, која и оваа година ќе биде дистрибуирана до сите основни и средни училишта. Се надевам дека ќе може да ја дистрибуираме и со еден од дневните весници во Република Македонија, така што збирката поезија ќе биде достапна до пошироката публика, рече Спасески.

Тој додаде дека Агенцијата за млади и спорт ќе продолжи со поддршка на младите и талентирани поети, кои се пред се средношколци, да продолжат да творат и своите дела да ги промовираат пред  јавноста.

Претседателот на Комисијата за избор на најдобрите творби Кочо Топузовски информира дека трет пат, традиционално Агенцијата за млади и спорт и ДПМ го организираат конкурсот на кој околу 60-тина млади автори испратија 100 песни.

- Ние, како жири-комисија избрана од ДПМ имавме пријатна обврска да ги прочитаме творбите, песните и една поема на младите автори. Имавме конкурентни песни, конкурентна поезија и денес пред нас е оваа збирка поезија, рече Топузовски.

Поетесата Виолета Танчева-Златева, која беше дел од комисијата, истакна дека позитивната страна на овој проект е тоа што им нуди можност на младите, на некои од нив прв пат, да се појават во книга и да ги видат нивните стихови отпечатени.

- Во овој наплив на електронско пишување, се повеќе ја сфаќаме вредноста на пишаниот збор во книгата, рече Танчева-Златева. 

Наградените и останатите млади поети, учесници на конкурсот, ги читаа своите стихови.