Кенијата ја прифати одлуката на кенискиот Врховен суд за поништување на изборите
Актуелниот кениски претседател Ухуру Кенијата ги критикуваше судиите на Врховниот суд и ги нарече „крадци“ откако пресудија да ги поништат претседателските избори на кои тој освои мнозинство гласови.
Во обраќањето до своите приврзаници на митинг во Најроби, Кенијата сепак повика да останат мирни и рече дека ја прифаќа одлуката на судот.
- Не се плашам од соочување на уште едно гласање, им порача претседателот, кој сака да добие уште еден мандат.
Кениската државна изборна комисија го прогласи Кенијата за победник на изборите одржани на почетокот од минатиот месец, со освоени 1,4 милион гласови повеќе од неговиот противник, кандидатот на опозицијата Раила Одинга.
Опозицијата одби да ги признае резултатите, тврдејќи дека бил хакиран ИТ системот на изборната комисија, а резултатите од изборите биле „изманипулирани“.
Врховниот суд со мнозинство гласови вчера ги поништи изборите, прогласувајќи ги за нерегуларни и спротивни на Уставот на Кенија и наложи одржување нови избори во рок од 60 денови.
Со пресудата, Врховниот суд не го обвини актуелниот претседател, ниту владејачката партија за причините кои предизвикаа прегласување на изборите.
Ваквата одлука во Кенија и во Африка се смета за „историска“, затоа што првпат претседателски избори на овој континент се поништуваат со одлука на домашен суд.
Во Најроби се стравува дека пресудата може да предизвика немири и улични судири, слични на насилствата кои избувнаа во 2007 година по контроверзните избори, кога беа убиени стотици лица.
На овие избори повторно имаше немири и насилство, кое беше многу помало од она пред десет години, но и сега загинаа најмалку 28 лица.
Ново на Сител
-
Ненад Димитријевиќ прогласен за МВП во ВТБ лигата
-
Од денеска поскапува регистрацијата на возилата
-
Мета: Победата на професорката Давкова ќе биде уште поубедлива
-
Протести во Венеција против туристичката такса - Судир на полицијата со демонстрантите
-
Кривична пријава за жител на Росоман за посредување и тргување со оружје или распрскувачки материи
-
Таравари демантира дека вчера имал тајна средба со Ахмети, на која добил понуда од него
-
Во германските продавници пронајдени се над сто килограми кокаин во пратките со банани
-
Тошковски во посета на ЕВР Центар и Бит Пазар