Кампања за подигнување на свесноста на заболувања на тироидната жлезда

Здружението за борба против рак „Борка-за секој нов ден“ од Скопје кон крајот на месецов ќе спроведе национална кампања за подигнување на свесноста за тироидни заболувања во Македонија, насловена „Виолетов караван 2016“.

Централната активност на кампањата ќе биде одбележување на Интернационалната недела на тироидната жлезда од 23 до 29 мај во Скопје и градовите низ Македонија.

Неделата ќе се одбележи на тој начин што во седум града низ Македонија ќе бидат поставени мобилни ординации за бесплатни ЕХО прегледи на лица кои немаат симптоми и немаат досега направено ЕХО на тироидна жлезда.

Прегледите ќе ги извршуваат докторите специјалисти: Венјамин Мајсторов, Даниела Миладинова, Синиша Стојановски и Маја Здравковска од Институтот за патофизиологија и нуклеарна медицина и Ирфан Ахмети и Искра Битовска од ЈЗУ Клиника за ендокринологија во Скопје. Мобилните ординации за преглед ќе бидат поставени во градовите по 8 часа дневно (двајца доктори по една четиричасовна смена) и ќе можат да бидат прегледани по 100 лица дневно.

Mобилните ординации за бесплатни ЕХО прегледи од 9 до 17 часот ќе бидат поставени на 23 мај на шеталиштето пред хотел „Београд“ во Струга, на 24 мај на плоштадот во Струмица, на 25 мај пред театарот во Велес, на 26 мај на плоштадот во Тетово, на 27 мај на плоштадот во Кичево, на 28 мај на плоштадот во Куманово и на 29 мај на плоштадот „Македонија“ во Скопје.