Изложба „Фортификација на сино“ на Валентина Илијевска

„Фортификација на сино“ е насловот на најновата, шеста по ред, самостојна изложба на младата кумановска уметница, Валентина Илијевска.

Шестата по ред самостојна изложба на Валентина Илијевска, прва изложба минијатури е продолжение на приказната отпочната во 2013 година со мини-артури, со поддршка од НЛБ банка, во чијшто изложбен салон беше поставена вчеравечер.

- Минијатурите се поставени како бедемски страни кои го штитат дводимензионалниот досега син квадрат кој провејува низ целокупното мое творештво. Сега овој квадрат е поставен тродимензионално, оправдувајќи го постоењето покрај со метафизичкиот свет, сега и со својата објективност, изјави Илијевска.

Изложбата содржи 28 минијатури, поставени на седум постаменти кои ги сиболизираат седумте светски чуда.

- Позитивно сум изненадена што во едно вакво време кога во државата владеат некои несогласувања, уметноста и културата проодолжуваат да се борат со своите вредности, додаде Илијевска.

Валентина Илијевска е родена 1987 година во Скопје, дипломира на ФЛУ, Скопје, оддел графика и графички техники во класата на проф. Мирко Вујисиќ, насока на конзервација и реставрација. Учествувала на бројни изложби во државата и странство, ликовни колонии од регионален и интернационален карактер.