Гевгелија го одбележа Денот на ослободувањето

Со положување цвеќе пред спомениците и обележјата на народните херои, паднатите борци и сите жртви на фашизмот, денеска во Гевгелија се одржа централната прослава по повод одбележувањето на општинскиот празник 7 Ноември – Денот на ослободувањето на Гевгелија.

Покрај општинската делегација што ја предводеше градоначалникот Сашо Поцков, цвеќе положија делегации на борците, пензионерите, политичките партии, здруженија на граѓани, делегации од збратимените општини Инџија, Пазин, Јабланица и Гвозд, како и претставник на руската амбасада во нашата земја.

По повод празникот, општинскиот Совет одржа свечена седница на која беа официјално соопштени имињата на добитниците на највисокото општинско признание,наградата ,,7 Ноември,, која се доделува јубилејно на секоја петта година.

Наградата за животно дело постхумно му е доделена на музичкиот педагог Александар Попов. За значајни постигнувања во изминативе пет години, наградата во вид на златни плакети им е доделена на музичките професори Љубица и Ѓорге Улишеви како и на граѓанското здружение „Тера“ за организација на манифестацијата „Смоквијада“ која стана општински заштитен бренд.

Сребрени плакети им се доделени на фолклорните ансамбли „Бојмија“ од Гевгелија и „Танец“ од Миравци, како и на театарската група „Дон Кихот“.

Изминатава недела под покровителство на општината беа одржани бројни културно уметнички манифестации во рамки на програмата за одбележување на Денот на ослободувањето на Гевгелија.