Дефект во инсталацијата - првична индиција за опожарениот автобус

Неисправна инсталација најверојатно е причината поради која попладнето на автопатот Скопје - Штип целосно изгоре автобус на штипската компанија Кит Го Прес. Оттаму велат дека врз основа на исказот од возачот, првична индиција е дека дефект во електриката би можел да го предизвика пожарот. Огнот почнал од задниот дел на автобусот каде што се наоѓа моторот, по што се раширил и низ целиот автобус кој бил без патници. Откако не можел сам да го изгаси, возачот успеал навреме да излезе од опожарениот автобус и да ги повика пожарникарите.

Од Територијалната противпожарна единица од Свети Николе за Сител велат дека на терен излегле едно возило со тројца пожарникари, а потоа на помош било испратено уште едно возило со тројца пожарникари. Инцидентот го потврдија и од МВР, чии екипи извршија увид на местото на настанот кој се случил околу 13 часот. Од компанијата посочуваат дека нивните автобуси редовно се регистрираат и сервисираат, а вештачењето треба да ја покаже вистинската причина за инцидентот.

Горан Симоновски