Aнгеловски: Очекувам повисоко ниво на игра од претходните дуели

Селекторот на А-националниот тим на Македонија, Игор Ангеловски денеска ја изврши првата прозивка за претстојниот квалификациски дуел со Шпанија што се игра на 12. ноември во Гранада.

Сите играчи пристигнаа со исклучок на голманот Димитриевски кој доцни поради летот од Шпанија.

За Ангеловски најважно е да се подигне нивото на игра од претходните средби и пред се од дуелот со Италија.

„Ме радува формата на репрезентативците и присуството на младите играчи кои остварија историски успех со пласман на Европското првенство. Имаме квалитет и верувам дека ќе ја продолжиме низата од добри игри. Секогаш велам дека за мене Шпанија е во топ-4 светски селекции и ќе биде тешко. Ние сакаме и против таква велесила да потврдиме дека сме кадарни да играме добро во континуитет“- оптимист е Ангеловски.

Македонија во рамките на квалификациите за големите настани по трет пат ќе гостува во Шпанија.

Првиот дуел во Квалификациите за ЕП 1996 г го одигравме во Аликанте кога бевме поразени со 3-0. Потоа гостувавме во Валенсија на 9. ноември 2014 година кога загубивме со 5-1.