Златен сертификат за волонтерство за „Мали Херои“ - Здружение за заштита на животните и животната средина

Младински културен центар - Битола ја додели наградата златен волонтерски сертификат, за најдобрите волонтери од Македонија за 2017 година.

Наградите се востановени и доделуваат во рамки на манифестациите посветени на 5 декември Меѓународен ден на волонтерите, а годинешни добитници на наградата се здружението „Мали Херои“ посветено на заштитата на животните и животната средина, и волонтерката Билјана Беловинова од Гостивар.

- Целта е да се даде на јавно признание на волонтери кои се вклучуваат за доброто на својата заедница, помагаат на други и ја промовираат солидарноста, хуманоста и сите позитивни вредности на волонтерските активности. Златен сертификат доделивме на Здружението за заштита на животните и животната средина „Мали Херои“ - Битола за континуиран волонтерски ангажман во заедницата кој посебно е видлив во застапување за правата на животните и подобар третман за бездомните животни, информираат од МКЦ Битола.

Годинава „Мали Херои“ вдомија 120 животни и обезбедија можност за вакцинирање и медицинска помош на многу бездомни животни. Златен сертификат доделивме и на Билјана Беловинова, млада девојка од Гостивар која луѓето од градот и околните села ја препознаваат како иницијатор и реализатор на бројни волонтерски хуманитарни акции и активности. Билјана голем дел од своето слободно време го посветува на давање помош и поддршка на лицата кои имаат низок социјален статус, стари и изнемоштени лица, социјално загрозени семејства како и деца и млади со различни попречености и посебни потреби, додаваат од МКЦ-Битола.