Времен сообраќаен режим на две делници на автопатот А1

Во пресрет на продолжениот викенд, Јавното претпријатие за државни патишта соопшти дека на одделни автопатски делници се одвиваат градежни активности и има времен режим на сообраќај за што е потребно соодветно следење на сообраќајните знаци. 

Времен режим на сообраќај има на А1, делница Демир Капија–Смоквица која е со важност до 01.12.2024 година, поради изведба на реконструкција на десната тунелска цевка на тунел Т1.  

Десната тунелска цевка на тунел Т1 е целосно затворена за сообраќај, а сообраќајот е целосно пренасочен во левата тунелска цевка со двонасочно одвивање на сообраќајот.

Исто така, до 31 декември 2024 година ќе има времена измена на сообраќајот и на автопатот на делницата Велес-Неготино, поради изградбата на делницата Градско-клучка Дреново, каде што сообраќајот ќе се одвива под времен режим со соодветно поставена сообраќајна сигнализација. 

ЈПДП повикува на внимателност и прилагодување на брзината согласно со условите на патот.