Во Велес одбележани 202 години од раѓањето на најголемиот балкански градител на цркви од 19 век Андреја Дамјанов

На гробот на Андреја Дамјанов во кругот на црквата „Свети Пантелејмон“ во Велес, која е една од неговите ремек  дела, денеска претставници на  Општина Велес и други присутни од јавните институции на градот одбележаа 202 години од раѓањето на градителот.

 

По тој повод букети цвеќе положија повеќе присутни делагации, а панихида на неговиот гроб одржаа свештени лица од Епархијата Повардарска.

 

Дуњамин Мехмед од Општина Велес пред присутните потсети за градителското дело на Дамјанов, кој е родум од велешкото село Папрадиште.

 

- Неговите цркви се сметаат за бисери на сакралната архитектура на Балканот. При изградбата на црквите Дамјанов особено внимавал на акустиката во ентериерот на црквата. Црквата посветена на Св. Пантелејмон  заштитникот на Велес е една од неговите ремек дела,а поради одличната акустика позната е и како „Македонска миланска скала“, потсети Мехмед.

 

Дамјанов ги изградил и црквата во манастирот  „Св. Јоаким Осоговски“ кај Крива Паланка, црквите „Св Богородица“ во штипско Ново Село и „Св Архангел Михаил“ во Чичево. Во Србија ги изградил црквите „Св. Илија“ во Печењавац, „Св. Ѓорѓи“ во Смедерево, соборните цркви во Ниш и во Сараево и ја завршил градбата на црквата во Мостар.

 

Андреја Дамјанов воедно е заштитник на архитектите во Македонија и нивни учител, а во негова чест се доделува и наградата за животно дело од областа на архитектура насловена со Андреја Дамјанов.