Во експлозијата во Истанбул загинаа шест лица, 81 повредени

Жена бомбаш самоубиец стои зад вчерашната експлозија во Истанбул во која загинаа најмалку шест лица, а 81 се повредени, соопштија турските власти.

Соопштувајќи го последниот биланс на жртви, турскиот потпретседател Фуат Октај објави дека две лица се тешко повредени.

– Сметаме дека станува збор за терористички напад, додаде Октај и посочи дека според првите информации се работи за експлозија на бомба која ја активирала жена.

Експлозијата се случи во централното градско подрачје во улицата Истиклал.

Претходно говореше и претседателот на Турција, Реџеп Таип Ердоган, кој исто така рече дека според првите податоци се работи за терористички напад.

Сè уште никој не ја презел одговорноста за експлозијата.