Седница на советот на градоначалници на Источно-планскиот регион во Карбинци

Советот на градоначалници на Источно-планскиот регион денеска одржа седница во општина Карбинци. Градоначалниците на 11-те општини од овој регион изразија задоволство од работата на Центарот за развој на источно-планскиот регион во текот на минатата година, а тоа се гледа и во извештаите за работа и аплицираните и реализирани проекти преку Бирото за рамномерен регионален развој и Програмата за Меѓуграничкна соработка меѓу Македонија и Бугарија.

Претседателот на Советот на градоначалници, Ратко Димитровски рече дека минатата година добиени и реализирани се неколку капитални проекти за развој на регионот.

- Можам да кажам дека минатата година направивме еден исчекор, во делот на заживување на Источно-планскиот регион заради тоа што успеавме да се наметнеме пред Министерството за локална самоуправа и Министерството за финансии да го зголемиме износот кој што следуваше за рамномерен регионален развој преку Бирото за регионален развој. Очекуваме дека и овој тренд ќе продолжи, рече Димитровски.

Тој додаде дека на денешната седница укажано им е на помалите општини да си ја платата чланарината, односно партиципацијата кон Центарот за развој на источно-планскиот регион.

Раководителката на Центарот за развој на источно-планскиот регион, Драгица Здравева вели дека за минатата година поголем дел од општините си ги подмириле обврските за чланарина. Досега се платени 1.300.000 денари, а остануваат да се исплатат уште околу 600.000 денари. Исплатата на чланарината на општините е со цел да се учествува во аплицирање на проекти кои се од регионален карактер.