Саливан: САД не испраќа сили за да почнат војна против Русија

Соединетите Американски Држави денеска соопштија дека не испраќаат војници за да почнат војна против Русија, откако распоредија дополнителни 3.000 војници во Германија и Источна Европа поради руско-украинската криза на границата..

– Претседателот Џо Бајден со месеци е „на чисто“  дека САД не испраќаат сили за да започнат војна или да водат војна со Русија во Украина, изјави советникот за национална безбедност Џејк Саливан за Фокс Њуз Сандеј. – Испративме сили во Европа да ја бранат територијата на НАТО, појасни тој.

Саливан, исто така, изјави за Ен-Би-Си дека „воена ескалација и инвазија на Украина може да се случи во секое време“.

– Ние веруваме дека Русите изградија капацитет да спроведат значајна воена операција во Украина и работиме напорно за да подготвиме одговор. Претседателот Бајден ги собра нашите сојузници. Тој ги зајакна и ги увери нашите партнери на источното крило, им даде материјална поддршка на Украинците и одделно им понуди на Русите решение по дипломатски пат, рече Саливан.