Путин на самитот Г20 ги критикуваше санкциите против Русија

Рускиот претседател Владимир Путин денес во Буенос Аирес ја критикуваше „лошата пракса на еднострани санкции и трговски протекционизам“, пред отворањето на самитот Г20 во аргентинската престолнина.

 

„Не можеме да не забележиме дека нечесната конкуренција сѐ почесто го заменува чесниот дијалог заснован врз еднаквоста меѓу земјите“, кажа Путин на средбата со лидерите на земјите од БРИКС (Бразил, Русија, Индија, Кина и Јужноафриканската Република).

 

„Се шири лошата пракса на посегнување по незаконски еднострани санкции и протекционистички мерки“, истакна рускиот претседател чија земја од 2014 година е под тешки европски и американски економски санкции поради кризата со Украина.

 

Изјавата следи и откако американскиот претседател Доналд Трамп ненадејно ја откажа билатералната средба со Путин предвидена за маргините на самитот на дваесетте најразвиени земји во светот.

 

Трамп пресвртот го објасни со тоа што Русија во неделата заплени три украински воени брода и зароби 24 украински морнари во најновата ескалација на тензиите меѓу двете земји во Црното Море.