Поларниот бран во САД убива: 12 лица починаа од студ, температурата падна на -34 степени

Студениот бран, кој го погоди американскиот среден запад и донесе рекордно ниски температури, однесе 12 животи и се прошири на североисточниот дел на САД.

Метеоролозите прогнозираат за викендов потопло време, но тоа е мала утеха за оние кои се соочуваат со ледените услови, брутални удари од ветер и температурите кои во одредени области се спуштија и на 34 степени под нулата.

Метеорологот на Националната метеоролошка служба Ендрју Орисон рекол за Ројтерс дека во утринските часови температурите ширум средниот запад се меѓу најниските.

Во делови на Илиноис во четвртокот биле измерени 36 степени под нулата, а во делови на Северна Дакота мину 30, а во Минесота и делови од Мичиген 29 степени под нулата.

Училиштата во Висконсин, Минесота, Мичиген, Илиноис и Ајова и натаму се затворени. Ледениот бран го зафати и Масачусетс, Њујорк, Пенсилванија и престолницата Вашингтон. Според податоците од метеоролошката служба, во Бостон е 15 степни под нулата.

„Ситуацијата во четвртокот утрото беше најлоша кога станува збор за студ. Североисточниот дел од земјата ја зафати најстудениот арктички воздух“, рече Орисон. Студот од сабота однесе најмалку 12 животи ширум средниот запад. Одредени лица починаа во сообраќајни несреќи поврзани со временските неприлики, додека некои замрзнаа на ниските температури“.

Исклучително е студено и во делови од југот, Кентаки, Тенеси и делови од Џорџија. Во средата ширум средниот запад се урнати рекорди кога станува збор за ниски температури, а најниската била во Минесота, дури 44 степени под нулата.

Официјалните лица соопштија дека во 85 отсто се забележани температури под нулата.

Меѓутоа ситуацијата треба да се смени до викендот. Во Чикаго, каде работниците ги палеа шините за да можат да се движат возовите, а температурата беше 30 степени под нулата, во сабота и недела треба да биде многу „потопло“ - и до 10 степени Целзиусови над нулата.

Поларниот бран предизвика стотици сообраќајни несреќи, додека во четвртокот утрото над 2.500 летови биле откажани, а најмалку 3.500 одложени, и тоа главно од аеродромите во Чикаго. Во тој град е нарушен и железничкиот сообраќај, наведува Гласот на Америка.

Компанијата Џенерал моторс ја запре работата во 11 фабрики во Мичиген, а на граѓаните им се апелира и да го штедат природниот гас. Последниот, сличен леден бран на средниот запад и североистокот бил пре повеќе од 20 години.