Пицула: Власта во Србија нема политичка волја да комуницира со ЕП

Известителот на Европскиот парламент за Србија, Тонино Пицула, изјави дека тој секогаш бил достапен за сите политички актери во Србија, но дека нивниот став кон него зборува многу за „(не)постоењето“ политичка волја за одредени опции државата да комуницира со ЕП за сите отворени прашања важни за членството.

Во интервју објавено денес за Демостат, Пицула вели дека соработката со парламентот во Србија не е онаква каква што треба да биде и дека контактите – што се однесува до претставниците на владејачката коалиција во парламентот и претставниците на владата воопшто – се ретки, но не поради недостаток на интерес од негова страна.

„Претставниците на останатите владејачки опции не изразуваат желба за средба или само ми испраќаат нервозни пораки преку социјалните мрежи. Почесто се среќавам со претставници на парламентарната опозиција и други актери, најчесто во Брисел и Стразбур“, рече Пицула.

Според него, властите во Белград го игнорираат фактот дека конечната ратификација на пристапниот договор меѓу Србија и ЕУ мора да се случи во Европскиот парламент.

МИА