Од денеска почнува исплатата на К-15: Mинималниот износ 19.116 денари

Од денес во приватниот сектор започнува исплатата на регресот за годишен одмор (К-15). Според важечките прописи, минималниот износ за 2026 година изнесува 19.116 денари, додека работодавачите можат да исплатат и повисок износ доколку тоа е уредено со интерни правила или колективен договор.

Регресот се пресметува врз основа на просечната нето-плата за февруари, март и април годинава, која изнесува околу 47.790 денари, а согласно Општиот колективен договор, К-15 изнесува најмалку 40% од таа основица.

На ова право имаат вработените во приватниот сектор кои имаат најмалку шест месеци непрекинат стаж кај ист работодавач во текот на календарската година, што значи дека не сите автоматски го добиваат регресот.

Фирмите кои работат со финансиски потешкотии или загуби можат да исплатат помал износ или да бидат ослободени од обврската, но само ако тоа е законски оправдано и со соодветна документација.

Доколку работодавачот не го исплати К-15 во законскиот рок, може да се соочи со инспекциски надзори и парични казни, а работниците имаат право да пријават неправилности до Државниот инспекторат за труд или да побараат судска заштита.