Наполи го купува Несторовски

Наполи покажува сериозен интерес за услугите на македонскиот репрезентативец Илија Несторовски. Напаѓачот на Палермо од почетокот на сезоната игра во голема форма и е единствената светла точка во тимот од Сицилија.

 

Наполи очајнички бара замена за повредениот напаѓач Аркадиуш Милик, а изборот на нивниот претседател Де Лаурентис е Македонецот Несторовски.

 

Де Лаурентис ќе се обиде трансферот да го реализира во јануарскиот преоден рок, поради што веќе стапил во контакт со првиот човек на Палермо Маурицио Зампарини.

 

Несторовски вниманието врз себе го привлече со одличните настапи и постигнатите седум гола во Серија А. Зампарини не е расположен да го продава својот најдобар играч, но контроверзниот претседател на Палермо е познат како „тврд преговарач“, додека ја постигне вистинската цена, а потоа попушта.

 

Сигурно е дека Зампарини ќе го продаде Несторовски доколку добие добра понуда, а според некои проценки таа би требало да изнесува не помалку од 10 милиони евра.

 

Несторовски оваа сезона пристигна во Палермо од хрватскиот Интер Запрешиќ за сума од 500.000 евра. На 13 натпревари има постигнато седум од десетте голови на Палермо во Серија А.