Коосновачот на „Телеграм“, под истрага за помагање терористички активности

Коосновачот на Телеграм, Павел Дуров е под истрага за помагање на терористички активности, објавија денеска руските државни медиуми.

Врз основа на материјали од руската Федерална служба за безбедност (ФСБ), државниот весник „Росијскаја газета“ тврди дека од 2022 година, бројот на регистрирани кривични дела извршени со користење на апликацијата за пораки надминал 153.000.

Се додава дека 33.000 кривични дела биле од саботажно-терористичка и екстремистичка природа, вклучувајќи организирање експлозии, подметнување пожари во воени канцеларии и убиства.

„Благодарение на работата на руската ФСБ, беше можно да се спречат 475 терористички напади што беа подготвени преку Телеграм“, се наведува во весникот.

Меѓу спречените кривични дела наводно имало 61 масовни пукања во училишта планирани од тинејџери.

Во статијата, исто така, се тврди дека терористичкиот напад од март 2024 година врз концертната сала „Крокус“ во Московската област бил координиран преку апликацијата.

„Жртви на дигиталната попустливост беа руски граѓани, блогери и новинари, вклучувајќи ги Дарја Дугина и Максим Фомин, како и девет високи воени функционери, вклучувајќи го и генерал-полковник Игор Кирилов.

Непријателот, користејќи аналитика на Телеграм, собрал податоци за нивните роднини, патни правци и дневни рутини“, се наведува во статијата.

Покрај тоа, се евидентирани околу 700 директни закани кон членови на семејствата на руски воен персонал. 

МИА