Гутереш: Нуклеарна војна не може да се добие и не треба да се води

Генералниот секретар на ОН, Антонио Гутереш, синоќа изјави дека нуклеарна војна не може да се добие и не треба да се води.

„Употребата на нуклеарно оружје ќе влијае на сите држави, што значи дека сите држави имаат одговорност да обезбедат такво смртоносно оружје никогаш повеќе да не се користи и целосно да се елиминира од националните арсенали“, нагласи генералниот секретар во изјавата за Меѓународниот ден за целосна елиминација на нуклеарното оружје.

Генералното собрание на ОН го прогласи Меѓународниот ден во декември 2013 година во својата резолуција 68/32. Овој ден дава можност за светската заедница да ја потврди својата посветеност на глобалното нуклеарно разоружување како заеднички приоритет.