Беса ќе создава опозициска платформа за изборите

Партијата Движење Беса на вечерашното централно собрание донесе одлука да создаде опозициска платформа со која ќе оди на избори. Иако пред месец и половина ја прифатиле понудата за коалиција на три партии со Алијанса за Албанците и Алтернатива, досега според лидертот Билал Касами немало средба и затоа Беса ќе соработува со други политички субјекти.

-Ние како Движење Беса пристапивме одговорно и искрено на целиот процес за да се дојде до една коалиција на албански партии кои ќе ги донесат промените и кај Албанците кои веќе 18 години не се направени. Со одлука на централно претседателство ја прифативме понудата на Алијанса за Албанците за една трипартитна коалиција каде требаше да биде вклучена Алтернатива која сега е дел од владината коалиција. За жал месец и пол од тогаш немам повратна  информација дали се спремни овие три страни да седнат и да договориме една таква коалиција, истакна Билал Касами на средба со новинарите.

Движењето Беса сега ќе бара други партнери.

– Отсега ние ги повикуваме сите интелектуалци, студенти, активисти, јавниот и невладиниот сектор, дијаспората да се вклучат на платформата која ќе ја подготви Движењето Беса со цел да ги донесеме промените и кај Албанците во Македонија за иднина во ЕУ. Изгубивме еден значаен период во кој ќе бевме поактивни во артикулирање на опозицскиот глас, но нема да бидеме разочарни од постапките на другите партии затоа што остануваме на наши позиции, истакна Билал Касами.